Java e dytë e Superligës nisi me ndeshjen Erzeni-Vllaznia, sfidë e luajtur në Rrogozhinë dhe e përfunduar në barazim 2-2. Shijakasit arritën të përmbysnin golin e Balajt, por ishte pikërisht kapiteni shkodran në limite i shmangu humbjen skuadrës së tij, duke i dhënë një pikë.
Sfida nisi më mirë për Vllazninë, që gjetën golin që në minutën e 7’ me Bekim Balajn pas një goditje dënimi në ekzekutuar në mënyrë perfekte nga kapiteni shkodran. Po me një gol fantastik u përgjigjën edhe shijakasit nga goditja e dënimit, me Redon Mihanan që ekzekutoi bukur dhe rivendosi baraspeshën.
Në minutën e 34’ ishte sërish Mihana i cili pengohet në zonë dhe proteston për një 11-metërsh, por gjyqtarja Rusta dhe më pas VAR-i lejojnë lojën të vazhdojë. Pjesa e parë përfundoi 1-1. Në të dytën, në minutën e 59’ ishte Zeka i cili me një supergol përmbysi shifrat në favor të shijakasve.
Por në fund, kur u mendua se Erzeni mori pikët e plota, një penallti me shumë polemika u shndërrua në gol nga Bekim Balaj, i cili vuri barazpeshën. Katër minuta më vonë ishte Gomes i cili shënoi golin e tretë për shkodranët, por VAR-i e anuloi për një pozicion të parregullt. Kështu Erzeni shkon në kuotën e dy pikëve, ndërsa Vllaznia në katër.